Руското воено воздухопловство овој месец ги интензивираше нападите на позициите на Исламската држава во Сирија.
Како што соопшти портпаролот на руското Министерство за одбрана, генерал-мајор Игор Конашенков, во сириската провинција Деир Ез Зор, авијацијата на руските воздушно-вселенски сили уништила нов команден центар на терористичката организација Исламска држава.
„Потврдена е ликвидација на 34 милитанти, уништени се пет џипови на кои што беа инсталирани тешки митралези, а уништени се и две возила со муниција“, изјави Конашенков.
Неодамна, руското воено воздухопловство ликвидираше над 300 припадници на Исламската држава, а деновиве две руски подморници лансираа крстосувачки ракети од типот „Калибар“ и исто така уништија командни центри и складишта со муниција на Исламската држава на истокот на Сирија.
Конашенков нагласи дека нападите на позициите на Исламската држава се во рамките на поддршката која што руските сили ѝ ја даваат на сириската армија која што моментално се бори против џихадистите на Исламската држава во близина на градот Деир Ез Зор на истокот од Сирија.