Во Гевгелија и вечерва се одржа мирен протестен марш како поддршка на иницијативата „За заедничка Македонија“.
– Рековме и не одрекуваме. Тука сме и ќе останеме на улиците се додека не се откажат од тиранската платформа, порачаа граѓаните кои го почнаа маршот од собирното место, пред споменикот на Сава Михајлов, а го завршија на шетелиштето во центарот на Гевгелија.
Не само 40, додадоа, туку уште толку денови и ноќи ако треба ќе бидеме по улиците на Гевгелија за да речеме категорично „не“ за т.н. тиранска платформа.
– Го повикуваме Заев и сите политичари да почнат да размислуваат за Македонија, да си го послушаат срцето македонско и да се откажат од тиранската платформа. Додека тоа не го направат, постојано во се поголем број ќе бидеме на улиците, на браникот на нашата татковина и нема да дозволиме некој да ја распродава, рече Бошко Петров.