Многумина кога ќе се спомене дуњата помислуваат на добра ракија од дуњи, а не се свесни колку е лековита дуњата и колку се здрави не само нејзиниот плод туку и семките, сокот, слаткото, компотот или чајот од дуњи.
Стеблото на дуњата наликува на стеблото од јаболкото, има височина од 5 до 7 метри, а може да биде и во облик на грмушка. Листовите се слични како кај јаболкото, а цветовите се големи со светлоцрвена боја. Цвета во мај и јуни, а плодовите се зрели кон крајот на есента.
Поради своите лековити својства, дуњата е позната одамна во митологијата и во народните преданија како симбол на љубов, среќа, плодност, памет, убавина, постојаност…
Лековит е плодот, листот и семето. Доколку дуњата не е прскана со хемикалии, може да се користи и нејзината кора за подготовка на лековит чај.
Облогите од дуња (плод, кора, лист…) се користат за лечење на: отворени рани, изгореници, испукана кожа или брадавици.
Состојките од дуња се користат и во козметиката.
Лековити состојки
Плодот на дуњата ги содржи следните корисни состојки: амигдалин, бакар, растителни влакна, растителни маснотии, биофлавоноиди, витамини Б2, Б3 и Б6, витамин Ц, железо, јаболкова киселина, калиум, манган, натриум, пектин, протеини, танин, етерични масла, цинк шеќери (разни видови).
Лековито дејство
Дуњата треба да се користи како лек, или како помошно лековито средство кога се во прашање следните болести и тегоби: акни, анемија, болести на грлото и носот (крајници), бронхитис, грчеви во желудник, грип и настинка, дијареа, егзема, лош здив, инфекции на кожата, зајакнување на имунитетот, кашлица, нервоза, несоница, изгореници, проблеми со желудникот и органите за варење, проблеми со кожни болести, разни инфекции, воспаление на органите за дишење, го забрзува зараснувањето на раните.
Затоа ви советуваме во својата исхрана да ја додадете дуњата како овошје, десерт или почесто да користите производи од дуња, особено како додаток во исхраната на децата.
