Одговорот на прашањето кое ги мачеше сите научници – што е постаро, кокошката или јајцето, конечно го најдоа научниците од Уницерзитетот Шефилд и Варвид, пишува британски Дејли Меил.
На најчестото поставувано прашање, најголем број од луѓето одговарале дека тоа е јајцето, со објаснување дека на тој начин дури и диносаурусите дошле на свет.
Но, научниците имаат поинаков одговор на „вечното“ прашање.
Нивното истражување покажало дека лушпата на јајцето од кокошка може да настане само од протеин кој се создава во јајниците на кокошката, што значи дека кокошката морала да постои пред јајцето.
Како што објаснуваат научниците, тој протеин се вика OC-17 и делува како катализатор кој го забрзува развојот на лушпата, а тврдата лушпа е потребна за да ја заштити жолчката од која се развива пиле.
Научниците во истражувањето користеле суперкомпјутер HECToR за да можат да ја зумираат внатрешноста на јајцето и да го следат неговиот развој.
Откриле дека протеинот OC-17 е клучен за поттикнување на кристализацијата во раните стадиуми на развојот на лушпата, на тој начин што го претвора калциумот карбонат во кристали калцит кои ја создаваат лушпата.
Кристалите калцит инаку може да се најдат и во коските и оклопите на разни животни, со тоа што кај кокошката тој се создава побрзо и произведува шест грама лушпа за 24 часа.
