Јас ништо не сум потпишал и никогаш нема да потпишам. Не ми е јасно зошто на некојси претседател му се потребни гаранции за унитарноста кога тоа не беше барано од другата страна, рече Зијадин Села на првото појавување во јавноста
Зијадин Села, лидерот на Движењето за реформи – ДПА и на „Алијанса за Албанците“, во своето прво појавување во јавноста рече дека тој не стои зад гаранциите што лидерот на СДСМ, Зоран Заев, ги достави во име на новото парламентарно мнозинство, а во насока за добивање мандат од претседателот Ѓорге Иванов за формирање влада.
Јас ништо не сум потпишал и никогаш нема да потпишам, вели Села во врска со гаранциите на Заев до Иванов.
– Унитарноста не се определува на протести или на друго место, туку во Собранието. Ако има двотретинско мнозинство тоа може да се смени. ВМРО-ДПМНЕ има 51 пратеник и значи ли тоа дека тие не се сигурни во сите свои пратеници како ќе се постават во таа состојба, изјави Зијадин Села.
Во врска со настаните од 27 април, пак, Села рече дека на тој ден бил извршен атентат врз барањата на Албанците.
– На 27 април беше извршен атентат врз политичките барања на Албанците. На 27 април донекаде успеаја да нè убијат, но ние пак се реинкарниравме и се вративме на политичката сцена во Македонија. Ќе продолжиме барањата на Албанците во Македонија да ги преточуваме во политички барања. Го продолжуваме овој наш пат и ќе се вратиме уште посилни на политичката сцена – рече Села на прес-конференцијата во партиското седиште во Тетово.
Разговорите за владата вели дека се тематски прашања што според него се позначајни отколку можните кадровски решенија.
– Во новата политичка влада без разлика дали ќе бидеме физички присутни или не ДПА – Движење за реформи како дел од коалицијата Алијанса за Албанците приоритет ќе има да бидат земени предвид и да се реализираат потребите и барањата на Албанците во Македонија, рече Села.
Тој беше пречекан од голем број негови симпатизери. Тие на себе носеа маички со ликот на Села. Над влезот во објектот каде што е сместено партиското седиште беа закачени знамиња на Албанија, НАТО, ЕУ, САД. Македонското знаме не е закачено.
