Доколку Турција се реши да им дозволи на мигрантите да ја напуштат нејзината територија и да се упатат кон ЕУ, меѓу земјите кои први ќе бидат на удар од мигрантскиот бран на европско тло е и Македонија.
Турција ја држи Европската унија во мал прст, со оглед дека се наоѓа во позиција лесно да поставува услови бидејќи во секој момент може да се случи милиони бегалци кои засега се на турска територија, да добијат зелено светло од Анкара и да тргнат кон ЕУ. Последната таква закана ја упати турскиот министер за надворешни работи, Мевљут Чавушоглу.
Незадоволен од досегашниот тек на разговорите за визна либерализација за турските граѓани кои сакаат да патуваат на теротиријата на ЕУ, Чавушоглу се закани повторно со бегалците, односно со ревидирање на спогодбата меѓу Брисел и Анкара за мигрантите.
– Турција може да ги ревидира или целосно да ги прекине сите договори во рамки на спогодбата со Европската унија за мигрантите, доколку Унијата не даде позитивен одговор за безвизниот режим за турските државјани – изјави денеска Чавушоглу.
Во интервју за телевизијата „А Хабер“, Чавушоглу изјави дека спогодбата за мигрантите и визната либерализација се пакет и додаде дека право на Турција е да ја преразгледа или да ја прекине спогодбата, доколку некои елементи не се исполнети.
Чавушоглу исто така нагласи дека Турција сега нема проблеми со Русија и може да ја зајакне соработката со Москва за примирје и политичко решение на кризата во Сирија.
Доколку Турција се реши да им дозволи на мигрантите да ја напуштат нејзината територија и да се упатат кон ЕУ, меѓу земјите кои први ќе бидат на удар од мигрантскиот бран на европско тло е и Македонија. Нашата држава е дел од т.н. балканска рута, по која во екот на миграцискиот бран поминаа стотици илјади мигранти, претежно од Сирија.
