INFOMAX.MK

Нови сателитски снимки од Maxar Technologies покажуваат огромен руски воен конвој на пат кон Киев. Конвојот, кој, според Максар, е долг повеќе од 64 километри, се движи кон главниот град на Украина од северозапад.

Си-Ен-Ен пишува дека конвојот, кој вклучува стотици тенкови, ракетна артилерија, оклопни и логистички возила, пристигнал од Белорусија, каде Русија ги акумулирала своите сили неколку недели пред инвазијата на Украина.

Претходно се шпекулираше дека конвојот е долг околу 27 километри, но сега се покажа дека станува збор за многу подолг воен конвој.

Должината на конвојот сведочи за количеството воена сила што Русите ја собраа во обид да го заземат Киев, но и за белоруската поддршка во инвазијата на Украина.

Во моментов во Киев дел од жителите се обидуваат на секаков можен начин да се евакуираат од градот. Редакцијата на Инфомакс е известена за најмалку две македонски семејства во околината на градот кои бараат од државата да бидат евакуирани.

Најчесто граѓаните се евакуираат со воз, а во моментов на железничката станица во Киев е центарот од каде граѓаните се евакуираат.

Погледнете како изгледаат овие траорни сцени во Киев.