Владиката Петар: СПЦ и БПЦ нѐ именуваат како Македонска православна црква

Митрополитот Преспанско-пелагониски на МПЦ-ОА, Петар, ја поздрави одлуката на Вселенската патријаршија за признавање на нашата црква како канонска.

– Им благодариме на сите и сега треба да се покажеме како кротко јагне. Некој ако нѐ нарекува Македонска црква, тоа се подразбира. Некој ако нѐ нарекува Охридска архиепископија (ОА), пак го содржиме и тоа име, бидејќи е поврзано. Да се признае црквата како ОА, го поздрабира истото, но очигледно на Цариградската патријаршија и црквите од грчкото јазично подрачје им пречи да се именуваме тоа име и од тие причини најверојатно е одлуката да биде нарекувани ОА. Ова може да биде и тројна формула. СПЦ секогаш комуницирала со нас како МПЦ, Бугарската црква исто така, и Руската црква исто така. Не е спорно да се именуваме како македонска – вели митрополитот во емисијата „Само интервју“.

– За нас е битното дека ние сме признаени под име Охридска архиепископија. Кажано е дека јуридискцијата се протега на територијата на Северна Македонија. Тоа е кажано во контекст дека ние не можеме да ја шириме нашата јурисдикција во нашето опкружување – додава владиката Петар.

Прашан што доколку не се најде решение во разговорите со СПЦ, тој потенцира дека „сме на прав пат и се надевам дека поскоро ќе дојде обединувањето на поделбите помеѓу Москва и Цариград“.

За Владиката Петар направениот попис бил политички, за да биде вистински, рече, има начин и методологија да се направи.

– Ние можеби ќе треба сега да си направиме наш попис православните според крештениците и да се утврди колку православни има во Републикава и колку не има во дијаспората – рече меѓу другото Владиката Петар, додавајќи оти сигурно две третини се надвор од татковината.

Share on Facebook

Tweet

Follow us

Save