INFOMAX.MK

Речиси три илјади англиски навивачи ќе се најдат вечерва на трибините на арената „Тодор Проески“, каде што Македонија ќе ги пречека избраниците на селекторот Герет Саутгејт во последниот меч од квалификациите за ЕП 2024, а кои веќе го окупираа центарот на Скопје со цел да се забавуваат додека почне натпреварот.

Најголем дел од нив ги окупираа кафулињата што се наоѓаат на Кејот „13 ноември“ во склоп на Градскиот трговски центар (ГТЦ), каде што се веат англиски навивачки значиња со имиња на градови ширум оваа држава. Најверојатно со цел да не дојде до инцидент, нашата полиција реши да го затвори овој дел за македонските граѓани, кои не можат да ги минат полициските контроли поставени на двете страни од кејот крај реката Вардар. Ова значи дека пиво и мезе пред натпреварот во кафулињата во срцето на Скопје ќе има само за Англичаните, додека навивачите на Македонија ќе мора да бараат други локации за да се загреат пред вечерашниот дуел.

Полициските сили во центарот на Скопје од час во час стануваат побројни, видливи се дури и борбени возила и специјални сили, се со цел денот и вечерта да мине во спортска атмосфера без инциденти, со оглед на репутацијата која ја имаат англиските навивачи, особено по десетина кригли пиво во себе.

Извор+фото: sport1.mk