Почина Симон Илиевски, доајен на охридското новинарство

По кратко боледување на 66 години денеска почина новинарот од Охрид, Симон Илиевски.

Се работи за еден од доајените на охридското новинарство.

Со новинарство почнал да се занимава уште од средношколските денови пишувајќи во гимназискиот весник „Јужен бран“, додека пак по завршување на студиите по новинарство во Скопје, пишувал за „Студентски збор“, белградски „Студент“ загребски „Студентски лист“, словенечките „Трибуна“ и „Катедра“, како и за весникот Младост, а кратко соработува и со Македонската радио телевизија.

Дописник бил на радио „Београд 202“, подоцна за „Студио Б“, а текстови објавувал и во познатите весници од времето на поранешна Југославија „Борба“, „Политика“ и„НИН“, а кратко соработувал и со државната агенција Танјуг.

Соработувал и со повеќе радија, а најголем печат остави во Радио „Охрид“, каде беше новинар долги години. По осамостојувањето на Македонија работеше во локалните телевизии АТВ од Струга, охридските „ТВМ“ и „НТВ“, а беше дописник на „Утрински весник“ од основањето и на телевизијата „Канал 5“.

Погребот е закажан за утре во 12:30 часот на градските гробишта во Охрид.

Share on Facebook

Tweet

Follow us

Save