По најавата на Путин: Билетите за летови од Русија распродадени, цените достигнаа рекордно ниво

Билетите за летовите од Русија брзо се распродадоа откако претседателот Владимир Путин потпиша указ за делумна мобилизација на 300.000 резервисти, пренесува Ројтерс. Цените на билетите за лет во еден правец од Москва, судејќи според веб-страниците на кои можете да резервирате и купите билети, достигнуваат рекордни цени.

Според веб-страницата travel.mediaalpha, за 22 септември цената на билетот во еден правец од Москва чини рекордни 3.323 долари, додека за денот подоцна, 23 септември, цените се движат од 1.600 до 5.600 долари во зависност од класата и број на трансфери.

Кога станува збор за други датуми, најдобрата цена моментално е 1.600 долари.

Најголем дел од летовите се распродадени.

Податоците на Google Trends покажуваат скок во пребарувањата за Aviasales, најпопуларниот руски сајт за купување авионски билети.

Директните летови од Москва до Истанбул, Турција и Ереван, Ерменија, двете дестинации без визи за Русите, беа распродадени во средата, според Aviasales, а некои летови за поврзување, вклучително и од Москва до Тбилиси, исто така беа недостапни.

Портпаролот на Кремљ, Дмитриј Песков, одби да одговори на прашањата на новинарите за можното затворање на границите на Русија за да се спречи бегството на лица на возраст од војска по најавата за делумна мобилизација за потребите на војната во Украина.

Тој рече дека руската влада „многу наскоро“ ќе објави кои категории граѓани ќе бидат ослободени од мобилизација на резервисти со воено искуство за да служат во Украина.

Share on Facebook

Tweet

Follow us

Save