„ПРИПАДНИЦИТЕ НА КФОР ДА НЕ ГИ ЧЕПКАТЕ!“ Вучиќ ги советува Србите на Косово како да протестираат

Претседателот на Србија Александар Вучиќ денеска во пресрет на Самитот на Европската политичка заедница во замокот Мими кај Кишињев изјави дека Србија ќе се обиде да ги зачува мирот и стабилноста и да направи сè за да ја деескалира ситуацијата на Косово.

Вучиќ по пристигнувањето на Самитот изјави дека средбите со францускиот претседател и германскиот канцелар Емануел Макрон и Олаф Солка нема да бидат лесни, но се важни.

На прашањето дали ќе се сретне со некој од косовските претставници, Вучиќ рече дека не знае кој сè е дојден од Косово, а непосредно пред него на Самитот дојде претседателката на Косово, Вјоса Османи.

– Отсекогаш сум бил лидер кој се залага за мир и правиме многу за да ги зачуваме мирот и стабилноста во регионот – изјави Вучиќ за новинарите во замокот Мими во близина на Кишињев, пренесе „Данас.рс“.

Тој изјави дека на средбите со Шолц и Макрон и другите лидери ќе се обиде да ги врати работите во нормала и да ја деескалира ситуацијата на Косово.

– За танго се потребни двајца, не зависи сè од нас – изјави претседателот на Србија.

Вучиќ рече дека утринава разговарал и со Србите од северот на Косово и дека ги молел да бидат „решителни да истраат на правото и правдата, но тоа да го прават на мирен начин, особено кон припадниците на КФОР“.

Тој рече дека е важно Белград да ги продолжи напорите да ги увери соговорниците да разберат дека излезноста од 3,4 отсто не е доволна за легитимни избори.

Вучиќ оцени дека САД испратиле вистинска осуда за однесувањето на Приштина и се надева дека тоа ќе биде случај и со Европејците.

Претседателот на Србија изрази очекување Лајчак и Ескобар да дојдат во Белград следната недела.

– Можевме да видиме и да предвидиме што се случува на Косово и Метохија, и го направивме тоа, но не можевме да го спречиме тоа – рече Вучиќ.

На прашањето дали ескалацијата ќе се прелее во регионот, Вучиќ рече: „Се надевам дека ќе успееме заедно да деескалираме и да ги зачуваме мирот и стабилноста и верувам дека ќе успееме во тоа“.

Share on Facebook

Tweet

Follow us

Save