Вработените во црквата Свето Благовештение во Прилеп по 10-ти јубилеен пат ја организираа хуманитарната акција за Божик. Во изминативе 2 недели во црквите во Прилеп беа поставени специјални кутии каде граѓаните можеа да донираат пари. Со собраните средства од граѓаните и дел од црквата се купија голем број прехрамбени производи кои денеска им беа поделени на 100 семејства. Секој пакет е во вредност од околу 2.000 денари.
„Имаме список, одиме нормално по некој список на семејства. Тој список го формираат самите свештеници бидејќи тие и најдобро ја знаат состојбата со парохијата, состојбата на овие семејства. Ние во консултација со семејствата се организираме и делуваме на подруг начин. Некогаш им треба градежен материјал, некогаш им требаат алишта, лекови, огрев, парични средства. Најмногу и најбитно е да се сконцентрираме на храната, тоа е најголемиот проблем“, изјави Драган Џокоски, Хуманитарна организација Свети Никодим Прилепски и Тисмански.
Вакви акции се организираат за Божик и Велигден. Оваа неофицијална хуманитарна организација го носи името на Свети Никодим Прилепски и Тисмански чија икона во 2015 година започна да мироточи токму во оваа црква. Капките од мирото и денес се познаваат на иконата. Освен акцијата се правеле и бесплатни погреби, венчавки и крштевски за оние кои немаат. Иако 10 години ја организирале акцијата сега за прв пат јавно излегуваат тоа да го кажат, велат дека не било православно човек да се фали ако помага. Се одлучиле на овој чекор како поттик и останатите граѓани да донираат.
„Не мора граѓаните да доаѓаат во црквата, па преку црквата да донираат. Нека го кренат само погледот насекаде низ градот, околу нив, онаму каде што работат, таму каде што живеат има многу сиромашни семејства. Нека подадат рака на тие семејства, нека пружат било каква помош“, истакна Драган Џокоски, Хуманитарна организација Свети Никодим Прилепски и Тисмански.
Акцијата е со благослов на Митроплитот Преспанско–Пелагониски Петар. Започнале со 20 пакети, а сега стигнале до 100. Од една страна се среќни што можат да им помогнат на повеќе семејства, а друга тоа е доказ дека имаме се повеќе сиромашни граѓани.
„И апостол Павле во едно од неговите посланија кажува верата без добри дела е мртва вера. Значи сиромасите ги имаме постојано до нас, ако им помагаме ним, тогаш и Господ ќе го цени нашиот труд и ќе не награди не двоструко, туку троструко“, рече Емилијан Зелнички, Хуманитарна организација Свети Никодим Прилепски и Тисмански.
Откако беа собрани пакети во знак на благодарност акцијата заврши со пеење на тропарот на Свети Никодим Прилепски и Тисмански пред мироточивата икона.
