Како што веќе ви е познато Сојузот на синдикатите на Македонија подолг временски период се соочуваше со упади на четворицата претседатели на грански синдикати кои заедно со поранешната техничка министерка за труд и социјална политика, Ременски, во обид да го реализираат влијанието на политички структури во континуитет вршеа опструкција во работењето на ССМ, велат од Сојузот на синдикатите на Македонија.
Во продолжение следува интегрален текст од соопштението на ССМ.
Денес во утринските часови групата фалсификатори заедно со самонаречениот В.Д. претседател Дарко Димовски, насилно влегоа во зградата на ССМ.
Во oваа прилика сакаме да Ве информираме дека решението кое незаконски беше донесено од страна на техничката министерка, Ременски, а со кое сакаше да направи промена во Сојузот на синдикатите на Македонија, на легитимното раководство, избрано на последниот 19-ти Конгрес на ССМ, е поништено.
Единствен претседател на ССМ и понатаму останува да биде д-р Живко Митревски, кој со решение е заведен како единствен претседател во регистарот на Министерството за труд и социјална политика и во Централниот регистар на Р. Македонија.
Со ова престанува лагата на самонаречениот претседател Димовски и групата фалсификатори и повеќе никој нема основ да се претставува В.Д. претседател на ССМ. Со ова секое понатамошно претставување на некои лица како ВД претседател на ССМ, претставува кривично дело и основ за поднесување на кривични пријави.
Поради тоа што наведената група изврши низа кривични дела како фалсификување на документи, фалсификување на волјата на членството на мнозинството на синдикатите, злоупотреба на службената положба, грубо кршење на Статутот, обид за насилно рушење на легитимно избраното раководство, обиди за нарушување на безбедноста на лицата и имотот на ССМ, лажно претставување, обиди за злосторничко здружување, неисплаќање на членарина и манипулирање со членството поради што на 13та седница на Претседателството на ССМ, одржана на 26.12.2016 година, 13те грански синдикати донесоа одлука за суспензија на 4те синдикати од членство во ССМ, а Советот на ССМ на својата 5та седница одржана на 28.12.2016 година, ја потврди суспензијата изречена од претседателството и истовремено изрече мерка исклучување од членството од Сојузот на синдикати на овие 4 синдикати.
За сите горе наведени кривични дела вклучително и денешното кривично дело, поднесени се кривични пријави против лицата: Дарко Димовски, Пецо Грујовски, Живко Даневски и Пеце Ристески, за сите овие кривични дела предвидена е казна затвор од 3 до 10 години.
