Претставникот на поранешниот американски претседател Доналд Трамп за дијалогот меѓу Белград и Приштина, Ричард Гренел, се огласи на Твитер, велејќи дека УНМИК е неефикасен и дека најновото насилство на Косово немаше да се случи доколку Трамп и неговиот тим беа на функција.
„Лидерот на Мисијата на Обединетите нации во Косово за неодамнешното насилство ги обвинува лошата комуникација, Европската унија, фон дер Лејен и НАТО. Но, тој е тој што е неефикасен и бавен. УНМИК е губење американски даночни долари и треба драстично да се реформира или да заврши“, напиша Гренел под емитување на седницата на Советот за безбедност на ОН за Косово.
„Убеден сум дека ова најново насилство немаше да се случи доколку Доналд Трамп и неговиот тим сѐ уште беа на функција. Тимот на Трамп се грижеше за Балканот и тие беа вклучени во деталите. Лидерството е важно“, рече Гренел.
Треба да се потсети дека предизвикувачот за немирите беше акцијата на косовската полиција во областите со мнозинство Срби на северот на Косово, извршена на 13 октомври, во која полицајци провалија во аптеки, продавници, магацини и други објекти, под изговор дека се борат против шверцот.
Во тоа време во северниот дел на Косовска Митровица се слушнаа сирени, граѓани се собраа на улиците, а полицијата употреби шок бомби. Србинот Сречко Софронијевиќ е тешко ранет од огнено оружје во Звежан, поради што е опериран, а уште неколку лица се повредени.
