Со десет пати над дозволената граница беа деновиве штетните ПМ 10 честички во Кавадарци, Гостивар, Тетово, Бутел и Центар.
Граѓаните се гушат уште на самиот почеток на грејната сезона. Досега најгласни поборници за чист воздух беа жителите на најзагадените општини Гази Баба и Аеродром, но тие подолг период се неинформирани бидејќи нема како да биде утврдена состојбата со загаденоста.
Револтирани се и граѓанските активисти, кои велат дека голем дел од барањата за справување со загаденоста што ги ветувале градоначалниците пред локалните изабори не биле ниту разгледани а камоли да ги спроведат на терен. Од О2 коалицијата реагираат дека е непопуларна мерка нефункционирањето на мерни станици.
-Ќе кажам дека е иронична мерка граѓаните да бидат неинформирани за загаденоста а тоа е да не работат мерните станици. Дел од нашите барања беа и интегрираните дозволи, односно надлежните да излезат на терен и да ги лоцираат големите загадувачи, како и да бидат исклучени од сообраќај возилата кои се под ЕУ стандардите – вели Драгана Велковска од О2 коалицијата.
Што работат на терен и како ќе го намалат загадувањето на воздухот став побаравме и од Министерството за животна средина, но не добивме одговор. Граѓанските организации покрај комуникацијата со надлежните за подобрување на состојбата, не ја исклучуваат и можноста за протест.
-Ние работиме и постојано сме активни, но ако треба и протест како мерка или притисок за нешто да биде преземено – вели Велковска.
И додека надлежните молчат, граѓаните се револтирани што неможат да отворат прозор за да влезе чист воздух. Покрај возрасните гласни се и децата на кои загаденоста им ја скратува детската игра.
И граѓаните и невладините организации се надеваат дека надлежните ќе почнат да работат на терен и Скопје повеќе да не биде најзагаден град во Европа. Во меѓувреме, и лекарите алармираат загадениот воздух може да предизвика сериозни компликации и кај децата и кај возрасните.
