Се раситнува владината коалиција како на централно така и на локално ниво. Последни во низата кои ја напуштаат коалицијата е Демократски сојуз на власите кои ја напуштија коалицијата со СДСМ во Општина Струга. Тие преку соопштение ја известија јавноста за нивната одлука.
Во продолжение Ви го пренесуваме нивното соопштение:
Кoлективното раководство на Општинската организација на Демократскиот сојуз на власите за општина Струга ги известува своите членови поддржувачи и симпатизери дека излеговме од коалицијата со СДСМ за Општина Струга поради арогантниот, препотентниот и циничниот однос кон нас изминативе четири години.
Не сакаме повеќе да сме бројка и декор во таа коалиција!
Најголем доказ за нивната игноранција кон нас е тоа што на листата со кандидати за советници предводена од СДСМ немаат ниту еден преставник од влашката заедница, тоа е голема навреда за нас власите кои живееме во општина Струга и придонесуваме за развој на општината и тоа во сите сфери.
За разлика од нив. На листата на кандидати за советници за Општина Струга на ВМРО ДПМНЕ, ставиле кандидат од нашата, влашка заедница и тоа на високото трето место што е реално добитна позиција и за прв пат нашиот ентитет ќе има советник во советот на општината.
Ја напуштаме коалицијата со СДСМ на локално ниво бидејќи заслепени од власта нашите коалициски партнери продолжија со арогантноста и цинизмот иако ги изгубија парламентарните избори во нашата општина и не извлекоа поука дека не може без оние кои те донеле на власт.
Повторно на листата со кандидати за советници има бајат партиски кадар и тоа на добитно место, истиот оној кој со “метлата„ на претседателот на СДСМ, г-динот Зоран Заев еднаш беше „изметен“.Неговата политичка реинкарнација и ставањето за кандидат во општинскиот совет ја прави таа листа губитничка, за жал. Метлата се знае што мети!
Раководство на ДСВМ-Струга