ОДБРАНАТА НЕЗАДОВОЛНА, ЌЕ ПОДНЕСЕ ЖАЛБИ: Се реализираа најавите за договорената пресуда, картелот на власт ја зароби државата

  • May 23, 2018

Се реализираа повеќемесечните пишувањата во дел од медиумите, како и предупредувањата на опозицијата, па и на самите обвинети во случајот „Тенк“. Судот денеска пресуди, 6 години и шест месеци затворска казна за Ѓоко Поповски, поранешениот помошник министер за внатрешни работи и две години казна затвор за поранешниот премиер Никола Груевски за набавката на блиндираниот „Мерцедес“.

По изрекувањето на пресудата, во изјава за медиумите одбраната истакна дека е незадоволна од донесената одлука на судот и ќе поднесат сериозна жалба.

-Како одбрана во овој предмет силно жалиме што Основниот суд Скопје 1 не ја прифати нашата силна аргументација која со леснотија ќе го победеше овој суд при изрекување на пресудата да донесе ослободителна пресуда. Не само тоа, но да донесе ако милуваше така, одбивателна пресуда. Од причина што не постојат услови за кривично гонење на ниту еден од обвинетите. Сигурно сме незадоволни и ќе вложиме сериозна жалба против ваквата пресуда на овој суд, истакна Димитар Дангов, еден од адвокатите на одбраната.

Груевски во изјава за медиумите пред околу 15-тина недела истакна дека Заев направил одреден договор со главниот судија во процесот за „Тенк“ и „Поткуп, за негово осудување.

-Дека тој нејзе ќе и овозможи да напредува, да стане судија на Апелациониот суд, а веднаш потоа и претседател на Апелациониот суд, а дека за возврат тој ќе биде прогласен за невин во случајот „Поткуп“, каде што има еклатантни докази, со ПИ мерки, изјави Груевски.

Груевски кажа дека договорот е и тој да биде осуден.

Во завршните зборови во случајот „Тенк“, Груевски истакна дека процесите кои се водат од СЈО против него и неговите соработници се класични и чисти политички судења.

Според екс премиерот целокупната операција за рушење на неговата власт траела неколку години со цел да се промени уставното име на државата. Тој потенцира дека судот под притисок нелегално стекнатите снимки мора да ги третира како легални, иако тоа е спротивно на законот.

-Овој фабрикуван предмет, во кој нема никакви докази против мене, се одвиваше мошне брзо, можеби најбрзо во историјата на македонското судство од независноста до денес. Почна во февруари, завршува во мај. Во предметот сум обвинет за сакање. Сум сакал да се набави блиндирано возило бидејќи сум сакал да се возам во него. Сум остварил корист оти ме возеле, не во една туку во друга кола, од истата марка. Генерации на наши потомци ќе се чудат за што бил обвинет поранешниот премиер, пред да разберат дека станувало збор за политички прогон, кажа Груевски.

Во денешното соопштение на ВМРО-ДПМНЕ, партијата наведува дека политичкиот суд на СДСМ ги реализира нарачките на криминалниот картел, само за да направи дефокус на јавноста од грабежот кој во моментов се одвива во Република Македонија

-Тоталното осиромашување на граѓаните е проблемот кој Заев го турка под тепих со монтираните судски случаи. Повисоки пензии нема, но затоа има пренос во живо од нарачани политички пресуди. Нови инвестиции и капитални проекти нема, но затоа послушните судии се расфрлаат со политички казни нарачани од криминалниот картел. Судството работи по двојни аршини, луѓе како Заев, кои флагрантно се фатени во криминал се ослободуваат, а луѓе кои чесно работеле ниту за себе обезбедиле против-правна имотна корист се осудуваат со драконски казни. Правосудството во Република Македонија го живее својот најсрамен период. Република Македонија е единствена држава во Европа со политички затвореници. Вакви процеси на политички прогон има само Северна Кореја, а можеби ни таму, стои во соопштението од партијата.

Од ВМРО-ДПМНЕ наведуваат дека државата е киднапирана од картелот на власт, а судството е под заробеништво лично на Зоран Заев. Република Македонија со вакво судство не може да се придвижи ни чекор кон ЕУ и НАТО

Претходно «
Следно »