Книга која била позајмена од Централната библиотека во Пејсли, Шкотска, е вратена со анонимно писмо со извинување и банкнота од 20 фунти.
Вработените биле запрепастени кога поштарот им доставил голема бела торба и кога ја отвориле откриле копија од книгата, која е всушност книга со рецепти на индиската авторка Балбир Синг.
Се претпоставува дека книгата била позајмена околу 1968 година, но бидејќи ова се случило одамна и пред да се дигитализираат записите, сега нема начин да се знае кој ја позајмил.
Во писмото што ја придружува вратената книга се вели: „Ве молиме, прифатете ги моите извинувања за доцното враќање на оваа книга“.
„Во прилог е надоместок за овој пропуст. Ви благодарам.”
Овие 20 фунти ќе бидат донирани во добротворни цели, бидејќи библиотеките во моментов не наплатуваат казна за враќање на задоцнетите книги.
„Ретко е да се врати книга откако ќе се доцни толку многу години. Се сомневам дека книгата лежеше во шкаф или фиока некое време и беше откриена неодамна“, вели Линда Флин, надзорничка на тимот на Централната библиотека во Пејсли.
„Тоа беше прекрасен гест од оној што ја најде книгата да одвои време да ја испрати назад со банкнота од 20 фунти како знак на почит затоа што е толку одложено. Ние ќе се погрижиме парите да одат во добра цел “, додава таа.
Сепак, книгата не е во состојба да се врати на полиците и да биде позајмувана, но ќе добие посебно место во библиотеката.
