Времето во последните денови не е погодно за плажа. Невообичаено ладно е и морската вода во Грција за овој период од годината.
Некои веќе имаат направено планови за летен одмор, а други сонуваат за крајбрежјето. Морето, сепак, е сè уште несоодветно и само најхрабрите влегуваат во него. Температурата на водата во Грција е пониска од очекуваната за сезоната.
Според податоците на метеоролошката служба на Националната опсерваторија во Атина, феноменот е забележан во речиси целиот Медитеран, пренесуваат европските медиуми.
Податоци од оваа недела покажуваат дека температурата на водата е помеѓу 16 и 17 степени во северниот дел на Егејското Море и во Јонското Море, додека во јужниот дел на Егејското Море е меѓу 18 и 19 степени. Отстапувањето од нормата за првите десет дена од мај е помеѓу еден и два степени.
Ладното море се должи на ниските температури на воздухот и силните ветришта во последниве денови.
Сепак, долгорочните опсервации покажуваат дека од 1982 година температурата на морската вода се зголемува секоја година, особено во источниот Медитеран, каде што температурата е веќе два степени повисока.
