Веќе втор ден облаци од чад го прекриваат Велес. Велешани во текот на целиот вчерашен ден дишеа загаден воздух, а поради ветерот кој дуваше во правец на градот целиот чад од пожарот на градската депонија, заврши право во градот.
Состојбата е најкритична во населбата Речани, каде жителите на населбата на социјалните мрежи се жалеа дека едвај дишат.
„Најзагаден воздух е кога има пожар на депонија, кога гори отпад во воздухот се ослободуваат најтоксичните материи кои имаат и канцерогени својства и затоа се трудиме ги концентрираме сите средства да го локализираме пожарот“ – вели Билјана Шуркова Манаскова, овластен инспектор за животна средина во Општина Велес.
Надлежните веруваат дека депонискиот гас е најверојатна причина за пожарот, но не се исклучува можноста дека станува збор за човечки фактор кој го предизвикал пожарот.
„Во велешката депонија постојат неформални собирачи на отпад кои постојано влегуваат и излегуваат, но може да настане и од човечки фактор ваква последица“ – вели Шуркова Манаскова.
Депонијата гори веќе втор ден, а надлежните според граѓаните се уште не реагирале соодветно на проблемот кој го имаат граѓаните.