Владата на Венецуела синоќа ги отфрли барањата од европските земји наскоро да распише нови претседателски избори.
Лидерот на владејачката партија Диосдадо Кабељо, истакна дека лидерите како што е шпанскиот премиер Педро Санчез би требало два пати да размислат пред на Венецуела да и „држат предавања“ за демократија.
Кој го избра него? Никој не може да дојде и да ни наредува, потенцираше Кабељо.
Високата претставничка на Европската Унија за надворешна политика и безбедност Федерика Могерини претходно порача дека ќе го признае опозицискиот лидер Хуан Гаида за претседател доколку Владата не распише нови избори во текот на наредните денови.
Министерството за внатрешни работи на Венецуела соопшти дека сега се разговара за воспоставување канцеларија за интереси на САД во таа држава и дека ќе му дозволи на персоналот на Амбасадата во Каракас да остане додека траат преговорите.
Преговорите за канцеларијата ќе бидат ограничени на 30 денови и по истекот на тој рок од Амбасадата на САД ќе мора да ја напуштат државата.
Владата на претседателот Николас Мадуро прекина дипломатски односи со САД во средата откако Вашингтон го поддржа опозицискиот лидер Хуан Гуаидо кој тој ден се самопрогласи за преоден претседател. Мадуро тогаш им даде три дена на вработените во дипломатското претставништво да ја напуштат Венецуела.
