Се посилниот ветер го разгоре шумски пожар северно од грчката престолнина, а пожарот и се заканува на електраната која е клучна за снабдување со електрична енергија во Атина, објавија денеска грчките медиуми.
Во исто време, пристапот до дел од автопатот беше прекинат, а жителите на две други населби во подножјето на планината Парнит беа евакуирани.
Илјадници луѓе денеска ги напуштија своите домови во предградието на Атина, а стотици беа евакуирани со чамци од блискиот остров Евија, на четвртиот ден од борбата против катастрофалните шумски пожари поттикнати од силните ветрови и екстремно високите температури.
Неколку предградија на Атина се евакуирани бидејќи горат пожари околу главниот автопат што го поврзува главниот град со северот на земјата, а стотици пожарникари се обидуваат да спречат ширење на пожарот во блискиот град Маратон.
Температурите цела недела надминуваат 40 степени Целзиусови, а не се очекува да паѓаат преку ден, додека силните ветрови од огнот би можеле да се прошират уште повеќе.
