Македонските кадетски одбојкарски репрезентативци го освоија бронзениот медал на Балканското првенство за играчи до 18 години во Урошевац (Феризај). Во последното, петто коло на турнирот, избраниците на селекторот Ванче Санев ја совладаа Албанија со 3:1(22:25, 25:19, 25:19, 25:22) и на тој начин завршија третопласирани. Ова е најголем успех на македонската одбојка во младинските возрасни категории, затоа што е прв медал од Балканијадите во која било конкуренција.
Црвено-жолтиот национален состав за одбојкари родени 2001-ва и помлади, турнирот во Урошевац (Феризај) го заврши со биланс од три победи и два пораза.
Овој резултат е убаво продолжување на успешната година на македонската одбојка, којашто во септември првпат ќе настапи на сениорски Европско првенство во машка конкуренција.
За нашата селекција на Балканијадите во Косово настапија: Гент Вела, Тино Шулајковски, Филип Савовски, Филип Лепидовски, Аган Рустеми, Лука Костиќ, Никола Младеновски, Димитар Илиевски, Бојан Џамбазов, Давид Стојанов и Стојче Арсов. Стручниот штаб го сочинуваа селекторот Ванче Санев и асистентите Игор Апел и Благој Тасев.
https://www.facebook.com/volleyballmkd/videos/2757101224319504/?v=2757101224319504
