Попладнево таткото на убиениот Никола Саздовски – Саздо, Тони Саздовски и претставници на Комити дадоа изјава пред Јавното Обвинителство во врска со барањето за зголемување на казната, коe ќе биде поднесено во Јавното Обвинителство.
После изјавите за медиумите следуваше Панихида за Саздо организирана од навивачката група Комити во Ракотинци од 16:45ч.
-Велат дека постојат само два типа на луѓе, добри и лоши. Човекот секогаш знае што е добро, а што лошо. Сите религии не учат да не нанесуваме зло на другите. Не учат дека и доколку свесно или несвесно погрешиме, барем да се покаеме, за да можеме чисти пред Бога да побараме прошка. Но кога ќе се стори смртен грев, и кога ќе згасне млад живот, кога нема враќање назад, како случајот со Саздо, тогаш најмалку што треба да направите е пред се најпонизно да застанете пред неговите родители и најблиски, да ги погледнете во очи, безусловно да се покаете и да побарате прошка, затоа што ним најмногу им ги зацрнивте животите. Ним им ја украдовте среќата, нив ги завивте засекогаш во црно, ним им ја одземавте и разделбата и последните зборови, поглед, насмевка, солзи, со нивното најмило чедо, пишуваат од навивачката група Комити.
