Жителите на неколку кичевски не се известени дека во водата што ја користат има бактерија. Продолжуваат да ја користат за пиење.
Надлежните ја испитуваат содржината и квалитетот на водата, но речиси никогаш не ги информираат жителите за резултатите.
Само пред неколку месеци, водата во селото Извор беше загадена со бактеријата ешерихија коли. Истата ситуација е и сега каде во четири села мештаните пијат вода во која е присутна бактерија. Како што велат, никој не ги известил за резултатите. Пред два дена Центарот за јавно здравје -Битола, извести дека водата за пиење од системите за снабдување на селата Длапкин Дол, Горна и Долна Грешница, како и Лешница е бактериолошки неисправна.
-Се известуваат жителите на селата Длапкин Дол, Горна и Долна Грешница и Лешница, дека водата од селските водоводи во четирите населби бактериолошки е неисправна за пиење и истата може да се користи единствено по превривање на повисока температура. Сѐ до добивање на нов наод кој ќе потврди дека водата повеќе не е бактериолошки неисправна, истата не ќе може да се користи за пиење и готвење во домаќинството-соопштија од Центарот за јавно здравје – Битола.
ТВ21 ги посети овие села, но како што се чини веста дека во водата има бактерија, мештаните ја слушнаа од нас. Зачудени велат дека не знаеле ниту дека е направено микробиолошко испитување на водата во нивните села.
-Ние како жители на селото не сме известени. Не, не од никого. Нека нѐ известат институциите за да знаеме што се прави тука-вели жител на село Грешница.
И мештаните од селото Лешница, исто така без никаква информација околу ова прашање:
-Не сме запознаени за ништо. Ниту дека земале вода за да направат анализа. Ништо не знаеме што се случува во селото. Од вас, медиумите, дознавме дека водата не е исправна за пиење, дека има бактерија и дека не смееме да ја пиеме. За следен пат бараме да одиме заедно со раководството на селото кога ќе земаат вода, за да знаеме дека навистина водата е земена од тука, а не вака, селото ништо да не знае-вели жител на село Лешница.
Ова е еден од ретките случаи годинава да има неисправна вода од системите на руралните села во кичевско, споредбено со претходните неколку години. Минатата година во многу села водата беше бактериолошки неисправна, а често содржеше и други штетни супстанци, објаснуваат од Институтот.
Извор: mk.tv21.tv
