Kалендарот не треба да се менува сè додека тоа не се случи на Вселенски собор, кога тоа сите ќе го направат, смета митрополитот Петар.
Православната црква служи според јулијанскиот календар, кој е донесен на вселенски собор, а преминувањето кон грегоријанскиот календар е можно само со одлука на Вселенскиот собор, вели владиката Петар митрополит преспанско-пелагониски и администратор австралиско-новозеландски во божикното интервју за МИА.
Тој појаснува дека јулијанскиот календар денес го применуваат руската црква, која според бројноста го има најголемото мнозинство во православниот свет, потоа српската, македонската црква, а некои цркви за да не се случуваат поделби во народот, вели, ги применуваат и двата календара. Такви се, наведува владиката Петар, примерите во романската црква, бугарската и црквата во Полска. Во овој контекст, како важен го посочува настанот од 1925 година што се случил во ерусалимската црква.
– Една од црквите, а тоа е најстарата, ерусалимската црква, која во 1925 година го промени календарот, во истата година по прифаќањето на новиот календар им се случи најнеочекуваното – не излезе благодатниот оган во гробот Христов, кој без свеќи влегува за да ги запали свеќите како што тоа вообичаено се случувало. Едноставно со новиот календар не се запалија свеќите и тие веднаш сфатија дека причината за тоа е смената на календарот и дека токму затоа Господ не им го испратил благодатниот оган. Веднаш потоа ерусалимската црква се откажа од смената на календарот и оттогаш и денес, повторно го применува јулијанскиот календар. Тоа е најголемиот доказ дека календарот не треба да се менува сè додека тоа не се случи на вселенски собор кога тоа сите ќе го направат – вели митрополитот г. Петар запрашан за можноста нашата црква да го прифати славењето на празниците според новиот грегоријански календар.
Тој, воедно, додава дека менувањето на календарот може да биде повод и причина за нова поделба на нашата црква, на нашата вера и на нашиот народ.
– Тоа не смее да се случи, освен ако тоа не е одлука која ќе важи за целата планета – дециден е митрополит владиката Петар.
