„ВМРО-ДПМНЕ работи на формирање на парламентарно мнозинство. Информации од непотврдени и непроверени извори нема да потврдуваме ниту да демантираме“ – реагираат од партијата по објавувањето на текстови на неколку медиуми на албански јазик дека наводно бил постигнат договор за владино мнозинство помеѓу ВМРО-ДПМНЕ и ДУИ.
Според шпекулацијата објавена и на порталот „Алмакос“, „Тетова24“ и уште неколку други портали на албански јазик, помеѓу двете партии, ДУИ и ВМРО-ДПМНЕ, наводно бил постигнат договор за владино мнозинство во кое Лазар Еленовски би бил следниот премиер бидејќи би бил прифатен и како Македонец но и како Албанец.
Преговорите за формирање на владино мнозинство ќе траат во наредните 20 дена, почнувајќи од конститутивната седница која се одржа на 4. август годинава.
За влада преговараат и СДСМ, а досега само ДПА на Мендух Тачи се изјасни јавно дека ја прифаќаат понудата на Зоран Заев.
