Остри реакции во грчката јавност откако Претседателот на ЕК Жан Клод Јункер во последното интервју за Дојче Веле говорејќи за евроинтегративните процеси на земјата неколку пати го спомна терминот Македонија и македонци. Ова кај грчките медиуми одекна како нова грешка на Јункер . Дел од насловите кои осамнаа во грчките медиуми денеска беа: Оган врз црвените линии на Грција , Македонците напредуваат, Провокација од Јункер .
Грчки CNN пишува дека – Претседателот на Комисијата граѓаните на ПЈРМ ги нарекуваше како „Македонци“, а паралелно рече дека името на земјата е „бирократски термин“
Прото тема пак коментира дека изјавата на Јункер доаѓа неколку дена откако Меркел во Берлин го пречека „македонскиот премиер“ и потсетува дека претседателот на ЕК и во минатото го искористил терминот „Македонија“, но тогаш „веднаш ја сфатил грешката и ја поправил“.
Новинарката на Прото тема во својата анализа понатаму коментира дека Јункер, сега, го прифаќа истото име, без двоумење и тоа во време на тешки преговори a вели повтореното погрешно споменување, ги прекршува одлуките и обврските на самата ЕУ и претставува индиректен притисок врз Грција.
Претседателот на ЕК Јункер во последното интервјуз за Дојче Веле рече дека Македонците се на добар пат и дека ги разбрале неговите размислувања и пораки. Сепак и вчера во Софија тој порача дека интеграциите на земјите од западен балкан ќе зависат исклучиво од нивниот напредок.