Набргу ќе има нагорна ревизија на предвидената стапка на инфлацијата за земјава од страна на Народната банка и тоа по вторпат годинава. Ова во изјава дадена за Фактор го потврди гувернерката на Народната банка Анита Ангеловска-Бежоска, откако Стопанската комора предупреди на вртоглав раст на цените до крајот на годината и побара помош од креаторите на политките.
На почетокот на ноември, кога се очекува да ги финализираме макроекономските проекции, ќе излеземе со нова проценка за инфлацијата за оваа година, но извесно е дека таа бројка ќе биде умерено повисока од 2,2 отсто“, најавува гувернерката.
Инаку, првичната планирана стапка на инфлација за годинава изнесуваше 1,5%, а сега најверојатно ќе достигне двојно од првичната проекција. Сепак, гувернерката во изјавата вели дека ситуацијата не е алармантна и дека оваа година во глобални рамки и се очекувало зголемување на цените, и на храната и на енергенсите, со оглед што тие паѓаа минатата година, па сега е практично многу пониска споредбената основа.
Европските медиуми наголемо пишуваат за енергетска криза во Европа и вртоглавиот раст на цените на електричната енергија и гасот. Цената на електричната енергија на берзите е зголемена за преку 200%, како и неколкукратно зголемување на цената на природниот гас.
Претседателот на Стопанската комора Бранко Азески испрати апел до Владата дека преработувачката индустрија е пред колапс и дека ако не интервенира Владата цените на производите ќе скокнат и до вртоглави 50%.
Премиерот пак рече дека не очекува раст на цените, затоа што струјата не учествува многу во крајната цена на производите.
