Масакрот во североисточна Буркина Фасо, во кој беа убиени над 130 лица овој месец, беше извршен главно од деца на возраст од 12 до 14 години, објавија Обединетите нации и владата.
Вооружени напаѓачи вечерта на 4 јуни го пребаруваа селото Солхан, отворија оган врз жителите и запалија куќи. Тоа беше еден од побруталните напад во последните години во област каде активни џихадисти се поврзани со Исламската држава и Ал Каеда.
Владиниот портпарол Усени Тамбура изјави дека повеќето напаѓачи биле деца, што предизвика осуда од страна на Обединетите нации, пренесува Ројтерс.
„Силно го осудуваме регрутирањето на деца и адолесценти од страна на паравоени формации. Ова е сериозно кршење на нивните основни права“, рече во четвртокот агенцијата за деца на ООН УНИЦЕФ.
И покрај интервенциите на мировните сили на Обединетите нации и меѓународните вооружени сили, нападите на исламистичките екстремисти продолжуваат низ целиот западноафрикански регион Сахел, вклучително и соседните Мали и Нигерија.
Локалните власти во северна Буркина Фасо, каде џихадистите контролираат големи области, изјавија дека децата-војници биле користени од исламистички групи во текот на изминатата година, но дека нападот овој месец бил далеку најзначаен.
Од 2018 година, сиромашната западноафриканска земја бележи нагло зголемување на нападите врз цивили и војници.
Стотици луѓе беа убиени, а над 1,2 милиони се раселени, соопшти УНИЦЕФ. Многумина беа принудени да останат во импровизирани кампови, а повеќе од 2.200 училишта се затворени – приближно едно од десет – погодени над 300.000 деца.
