Државната изборна комисија веќе точно 25 часа од затворањето на гласачките места, нема официјални информации и 100% обработени податоци за бројот на освоени гласови и пратенички места на партиите кои ја бараа довербата на граѓаните на предвремените парламентарни избори.
Според Изборниот законик со Член 135 се пропишува:
(1) Државната изборна комисија првичните резултати од изборите добиени по електронски пат ги објавува сукцесивно, а резултатите врз основа на податоците од записниците од општинските изборни комисии односно Изборната комисија на градот Скопје во рок од 12 часа по завршувањето на изборите,
(2) Државната изборна комисија конечните резултати од изборите ги објавува веднаш, а најдоцна во рок од 24 часа од денот на нивната конечност.
Ова значи дека според Изборниот законик, ДИК требаше да ги соопшти мандатите најдоцна и заклучно со 19 часот, на 12.12.2016 година (денеска) а бидејќи тоа не го направи, го прекрши Изборниот законик.
Од ДИК синоќа најавија дека во текот на денов ќе излезат со конечните резулати и распредлелбата на мандатите, но се уште нема најава за прес конференција. Рокот во кој сите очекуваа ДИК да излезе со официјални податоци за распределбата на мандатите завршуваше во 19 часот, но од ДИК велат дека рокот е испочитуван со самото тоа што тие веќе излегоа со податоци за гласовите по изборни единици, а мандатите можат да бидат соопштени и подоцна.
„Во ДИК се уште има членови на општинските изборни комисиси кои доставуваат изборен материјал и печати, влегуваат со кутиите и членовите истите ги прегледуваат. Утврдуваат дали се сите на број. Официјалната прес-конференција не е објавена. На прашањето дали ќе го испочитуваат рокот од 24 часа, објаснувањето е дека тие го запазиле рокот со тоа што околу 3 часот ги објавија резултатите, а мандатите не се прекршување на рокот. Велат, ниту една партија не поднела приговор околу изборните резултати“, вели нашата репортерка од терен.
