Актуелниот градоначалник на Куманово, Максим Димитриевски, кој беше исклучен од Социјалдемократскиот сојуз откако најави независна кандидатура за нов мандат, вечерва во гостувањето на Сител телевизија изјави дека неговата цел е „суштински, одвнатре да ја промени партијата“.
„На последниот конгрес имавме заклучок дека токму различноста во партијата ќе се негува, а видовме со пример како се негува денеска таа различност. Јас ќе направам се да ја променам суштински самата партија одвантре, заедно со членовите, бидејќи има голем број на членови коишто не се слагаат со ваквите политики на актуелното раководство или на поединци коишто го имаат узурпирано актуелното раководство, а на коишто претседателот Заев им прави во континуитет отстапки. На што се должи тоа, самиот ќе треба да објасни“, рече Димитриевски.
Според него, не може да зборуваме за демократија во државата, без првично да биде воспоставена внатрепартиска демократија во политичките субјекти.
