Министерот за надворешни работи, Никола Димитров, појасни што сакал да каже кога ја дал изјавата дека македонскиот јазик не се однесува на грчките Македонци. Димитров го изјави ова при потпишувањето на Спогодбата за отворање на граничниот премин во месноста Маркова нога, пренесува Фокус.
Тој посочува дека е битен контектост во кој ја дал изјавата, односно дека се повикал на членот 7 од Договорот од Преспа.
„Суштината на договорот од Преспа – во секој случај еден од главните столбови – е прифаќање на различното разбирање на термините Македонија и македонски, кои за нас значат едно, а за Грција друго.
Ние сме етнички Македонци, припадници на македонскиот народ, со сопствена историја, култура, и наследство. Ние зборуваме македонски јазик, што е еден од јужнословенските јазици.
Грчките Македонци, во грчкиот контекст и разбирање на овие поими, се етнички Грци од грчкиот регион Македонија, кои зборуваат грчки јазик, со посебен однос кон хеленската цивилизација, историја, култура и наследството.
