Несовесни студенти ги вандализираа новите лифтови во државните студентски домови само неколку месеци по нивното поставување.
По оштетувањето на новоинсталираните лифтови во “Кузман Јосифовски-Питу“ и “Гоце Делчев“ каде студенти предизвикаа и дефект на сигурносната врата, до нашата редакција пристигнаа и фотографии од лифтовите во студентскиот дом “Пелагонија“ во општина Кисела Вода, на кои може да се види дека целосно е уништена внатрешноста на кабината, па се добива впечаток дека лифтот е во употреба неколку децении, иако се уште не е изминат ниту неговиот гарантен период.
Но, гаранциите кои ги даваат производителите се за проблеми и дефекти кои би се случиле од технички аспект, а не за проблеми со домашното воспитување и чувство на одговорност од страна на оние кои наместо лифтовите да ги користат за возење, ги користат за излевање на личните фрустрации, бес и нервоза.
Ги контактиравме надлежните, кои велат дека се запознаени со ваквите состојби. Санкции се превдидени, но само доколку сторителите бидат пронајдени – што досега не е случај. Има и случаи кога ниту безбедносните камери, онаму кадешто ги има, не ги спречуваат дел од студентите да се однесуваат спротивно на правилата за престој во овие установи и да ја спроведат лошата намера.
Инаку, лифтовите беа набавени од страна на Министерството за образование и наука пред само неколку месеци.
“Ова е исклучително значајно затоа што на овој начин ќе се подобри целокупната фреквенција и функционалност во студентските домови, а тоа пред сé е во интерес на студентите“, истакна заменик министерот за образование Спиро Ристовски при промоцијата на инвестицијата вредна 15 милиони денари.
Наскоро државните студентски домови ќе добијат и целосно нов мебел. Дали новите кревети, душеци, плакари, бироа и столици, ќе ги снајде судбината на лифтовите, зависи од свеста на идните академски граѓани, кои во прилично голем дел бесплатно, или по минимални цени ги користат државните услуги за сместување, престој и исхрана за време на студирањето.
