Европскиот парламент денеска усвои резолуција со која се повикува Европската комисија да ги искористи сите расположиви инструменти за да и помогне на Хрватска да ги санира последиците од земјотресот.
Резолуцијата за ублажување на последиците од земјотресот во Хрватска беше усвоена на попладневната сесија на ЕП во Брисел со 677 гласа „за“ и пет „против“, пренесуваат хрватските медиуми.
Минатата година Хрватска беше погодена од два силни земјотреси, на 22 март во областа Загреб и на 29 декември во областа Петриња, во кои загинаа осум лица, а десетици илјади куќи беа уништени или оштетени.
Потпретседателот на Европската комисија Дубравка Шуица рече дека во дебатата „сите пратеници, од лево надесно, укажаа на важноста на членството во ЕУ и солидарноста на која може да смета Хрватска“.
Таа посочи дека помошта за погодената област се однесува и на нејзиниот оддел во Комисијата, демографијата, бидејќи погодената област на централна Хрватска има постојан демографски пад и пред земјотресот.
„Затоа, многу е важно да се обнови економијата и инфраструктурата паралелно со реновирање на куќи, така што луѓето ќе можат да останат во областа“, рече Шуица.
Пратеникот Валтер Флего, кој го иницираше усвојувањето на резолуцијата, рече дека од Комисијата е побарано да стори сé за да и помогне на Хрватска, од Фондот за солидарност, седумгодишниот буџет, Механизмот за цивилна заштита.
„На Хрватска и треба помош сега и сега, со што е можно помалку бирократија и што е можно поголема солидарност“, рече Флего.
Усвоената резолуција ја повикува Комисијата, заедно со европските и хрватските институции, „да смислат брз начин за дистрибуција на потребната финансиска и друга помош за да се обезбеди брзо закрепнување на погодената област“.
Од Комисијата се повикува да земе предвид дека Хрватска во исто време се бори против пандемијата на коронавирусите при одобрување финансиска помош.
Од Хрватска се повикува да даде приоритет на реконструкцијата на куќите и зградите во својот план за обновување, внимавајќи да биде отпорна на земјотреси.
Хрватските власти се повикуваат внимателно да ја следат реконструкцијата по земјотресот за да се обезбедат највисоки сеизмички стандарди за сите згради и инфраструктура.
Во резолуцијата се наведува дека процесот на реконструкција и изградба треба да се спроведе што е можно побрзо, транспарентно и под стручен надзор, како и дека треба да се земе предвид демографскиот аспект со цел областа да има развојна перспектива.
Затоа, се вели дека треба да се посвети посебно внимание на изградбата на инфраструктурата што недостасуваше уште пред земјотресот и да се осигури дека сите основни потреби и услуги се исполнети во сите делови на погодената област.
Комисијата е поканета да разгледа продолжување на рокот од 18 месеци за користење на Европскиот фонд за солидарност во случај на силен и разорен земјотрес.
Резолуцијата ги пофалува напорите на спасувачките тимови, цивилната заштита, хрватските вооружени сили, волонтерите, граѓанските организации, меѓународните организации и локалните, регионалните и националните власти за спасување животи и ублажување на последиците од земјотресот.
Во текстот исто така се вели дека приоритет во вакцинацијата против ковид 19 треба да биде погодената област и ја охрабрува хрватската влада да ја спроведе најавената одлука за пренасочување на значителен број дози на вакцини кон округот Сисак-Мославина. Земјите-членки на ЕУ се очекува да остават дел од залихите со вакцини на Хрватска.
