Заедничката изјава потпишана во понеделникот (28 септември) меѓу САД и Грција, за време на посетата на американскиот државен секретар Мајк Помпео, испрати збунувачки пораки за тоа дали Вашингтон и Атина го сметаат договорот за промена на името во Северна Македонија (Договорот од Преспа) за историски или не, пишува Еуроактив.
Во првичната заедничка изјава [прикажана подолу] стоеше „историскиот“ Договор од Преспа. Англиската верзија на изјавата беше веднаш објавена на веб-страницата на грчкото Министерство за надворешни работи, но грчката верзија воопшто не беше објавена.
Сепак, неколку часа подоцна, зборот „историски“ исчезна од заедничката изјава објавена на веб-страницата на грчкото Министерство за надворешни работи и на американската амбасада во Атина.
Ниту една од страните досега не даде објаснување за оваа промена, пишува Еуроактив.
Помпео престојуваше во клучна посета на Солун, во северна Грција и Ханија на островот Крит, две места кои не се избрани случајно, објавија грчките медиуми.
Посетата на Солун го потврдува интересот на Вашингтон за северна Грција во контекст на нејзината конкуренција со Русија за политичка и економска надмоќ во регионот на Балканот.
Руските олигарси имаа влијание врз северниот дел на Грција и дури се обидоа да го блокираат договорот за промена на името со Северна Македонија (Договорот од Преспа) пред неколку години.
Кога Нова демократија, конзервативната партија на грчкиот премиер Кирјакос Мицотакис, беше во опозиција, таа цврсто се спротивстави на Договорот од Преспа, инициран од левичарската влада на Алексис Ципрас.
Многу пратеници од Нова демократија во минатото дури учествуваа во масовни протести против договорот, разочарувајќи многу нивни колеги во Брисел и Вашингтон.
Кога Нова демократија ја презеде власта, направи брз пресврт и јавно го поддржа договорот, како и патот на ЕУ за Северна Македонија.
Премиерот на Северна Македонија, Зоран Заев, неодамна се состана со неговиот грчки колега и се согласија за три меморандуми за разбирање како дел од договорот за промена на името.
Овие меморандуми треба да поминат низ грчкиот парламент и Ципрас побара изјаснување на секој пратеник поединечно, што става во тешка позиција голем број конзервативни политичари.
„Очекувам 158 извинувања“, им порача Ципрас на пратениците во понеделникот, потсетувајќи на нивното претходно спротивставување на договорот за промена на името.
Досега, владејачката партија Нова демократија не успеа да најде известувач кој ќе ги води трите меморандуми низ парламентот.
