March 28, 2024, 12:53 pm

Заев, Димитров и влaдинaтa дeлeгaциja дeнecкa вo Атина

Поврзано

- Advertisement -
- Advertisement -

Претседателот на Владата Зоран Заев и заменик-претседателот на Владата задолжен за европски прашања Никола Димитров ќе учествуваат на шестиот Делфи економски форум во Атина, а во текот на денешниот и утрешниот ден ќе се сретнат и со претставници на грчкиот државен врв, јави дописничката на МИА од Атина.

Премиерот Заев на Форумот ќе дискутира со уредникот на „Катимерини“ Атанасиос Елис, а во 16 часот по локано време ќе се сретне и со неговиот грчки колега Кирјакос Мицотакис.

За разлика од претходната нивна средба во Атина во септември мината година, кога беа на работен ручек, овој пат, Мицотакис ќе го прими Заев во неговиот кабинет, во премиерската палата.

Портпаролката на грчката Влада Аристотелиа Пелони на редовниот брифинг со новинарите, во понеделникот, одговарајќи на прашањето на дописничката на МИА од Атина рече дека билатералната соработка и имплементацијата на Договорот од Преспа ќе бидат темите за кои ќе разговараат премиерите на Грција и Македонија.

Планирано е, на маргините на форумот Заев да има одделни средби со лидерот на СИРИЗА Алексис Ципрас, со поранешен премиер на Велика Британија Тони Блер, како и со други политички претставници од меѓународната сцена и со претставници на компании и стопански комори.

Заедно со премиерот, во Атина се и вицепремиерите за економски и европски прашања Фатмир Битиќи и Никола Димитров и министерот за економија Крешник Бектеши.

Димитров, ќе учествува на две панел дискусии на Делфи форумот. Првата е утрово, на која заедно со шефот на кипарската дипломатија Никос Христодулидис, со алтернативниот министер за надворешни работи на Грција Милтијадис Варвициотис и со универзитетски професори и ќе дискутираат за „Дипломатијата на малите држави во комплексниот поредок“.

Утре, вицепремиерот заедно со Еврокомесарот за добрососедска политика и проширување, Оливер Вархеји ќе разговараат на тема „ЕУ и Западен Балкан: исполнување на долгоочекуваното ветување“.

На маргините на Форумот, предвидено е вицепремиерот Димитров да оствари и повеќе билатерални средби, меѓу кои со неговите колеги од Грција и Кипар, Никос Дендиас и Никос Христодулидис, со специјалниот претставник на ЕУ за дијалогот Белград- Приштина, Мирослав Лајчак, како и со министерот за дигитализација на Грција – Кирјакос Пјеракакис.

Димитров, како што соопштија од Секретаријатот за европски прашања, како дел од делегацијата на Македонија предводена од премиерот Заев, ќе го придружува и на средбата со грчкиот премиер Мицотакис, како и на други значајни средби од агендата на претседателот на Владата.

На панел дискусија на Форумот, во вторникот учествуваше и министерот за животна средина и просторно планирање Насер Нуредини.

Економскиот форум е под покровителство на грчката претседателка Катерина Сакеларопулу, традиционално се одржува во градот Делфи, но оваа година поради Ковид-19 е во палатата „Запио“ во Атина и се следи онлајн.

Почна во понеделникот, а ќе трае до 15 мај, има над 1.000 учесници од 42 земји и 372 сесии на десет различни теми како што се геополитиката и меѓународната безбедност, светската економија, иднината на Европа, здравството, климатските промени, општеството, образованието, културата итн.

Економскиот форум Делфи е независна и непрофитна организација со меѓународен карактер, каде секоја година се среќаваат престижни личности од економијата, политиката и академската заедница.

Целта на Форумот е да претстави реална рамка на цели и активности, да се бараат политики за справување со глобалните предизвици и да се најдат соодветни решенија за сложените и меѓусебно зависни прашања со кои се соочува Грција, Југоисточна Европа и Источниот Медитеран.

На прес конференција пред 20 дена кога беше презентирана програмата и беа соопштени детали, претседателот на Делфи економскиот форум Симеон Цомокос, откри дека планирано е да организираат настан во Скопје на крајот на јуни.

Latest News

Богата агенда:Со кого ќе се сретнат денес Ковачевски и Османи во Софија?

Владата ја објави денешната агенда на Премиерот Ковачевски, министерот за надворешни работи, Бујар Османи и останатиот владин состав. "Вечерва заврши...

More Articles Like This