По речиси седумчасовна потрага МВР успешно ја заврши спасувачката акција при која се пронајдени шестмината скијачи кои попладнево се изгубиле на Попова Шапка откако се качиле на Церипашина.
– Вечерва околу 21 часот се пронајдени и спасени шестмина скијачи кои денеска се изгубија на Попова Шапка.Околу 17. 30 часот во Полициското одделение Попова Шапка дошол 30-годишниот Ф.Р од тетовското село Лисец. заедно со косовскиот државјанин М.З. и пријавиле дека двајца косовски и четворица македонски државјани околу 14 часот и 30 минути со жичница се искачиле на „Церипашина“ и потоа се спуштиле по патеката Јелак. Но, поради густата магла залутале и се изгубиле во непознат шумски предел, некаде два километри северно од месноста „Шипковачки бачила“, над селото Вешала.
Веднаш е организирана потрага по шестмината скијачи и околу 21 часот сите се пронајдени живи и здрави во месноста „Студорек“, во близина на „Шипковачки бачила“, и со ратрак веќе се спуштаат кон Полициското одделение Попова Шапка – , соопштуваат од МВР.
