Изгаснат пожарот во Кисела Вода, пожарникарите ги извлекуваат станарите кои останале изолирани заради огнот
Противпожарните служби успеаја да го изгаснат пожарот кој ја зафати денеска станбената зграда, во населбата Кисела Вода на улицата ,,Народни херои“ број 23.
Според информациите на Телма од теренот, акцијата за гаснење на пожарот траела повеќе од 2 часа а пожарникарите сега се обидуваат да ја завршат и евакуацијата на станарите кои останале изолирани над станот зафатен со огнената стихија.
Последна била евакуирана една хендикепирана жена, чие извлекување беше најголем предизвик за пожарникарите. Претходно биле евакуирани и две деца и еден маж.
Пожарот избувнал на стан на 5-тиот кат од зградата. Околу зградата се собрале и поголем број локални жители, кои ја следеле работата на пожарникарите.
Неофицијално, еден од пожарникарите е повреден, со помали изгореници но и заради вдишувањето чад бил пренесен во болница за да се санираат неговите повреди.
Улиците кои водат до овој дел на Скопје се блокирани. Полицијата не пропушта возила кај „Мечкаров“, кај Тутунски комбинат и кај општинската зграда.
