Европската унија да го почитува сопствените принципи и да ги раздвои пристапните процеси на Македонија и на Албанија, побара денеска шефот на дипломатијата Димитров, обраќајќи се пред Комисијата за европски прашања на која беа присуствуваа и амбасадорите на земјите-членки на Унијата.
Тој рече дека земјава не прифаќа да биде условувана со исполнување на критериуми во други земји.
Двајцата надлежни за евроинтеграциите Османи и Димитров, во обраќањето пред Комисијата порачаа дека чувството на горчина од недобивањето датум не смее да ја оддалечи земјава од европскиот пат.
Димитров притоа рече дека Македонија мора да го положи тестот на зрелоста и да и покаже на Франција и скептичните земји дека процесот може да носи резултати, додека за Османи нема простор за неисполнување на европските стандарди.
Комисијата која започна со драмски ефекти и емоции остана посиромашна за конструктивна дебата меѓу власта и најголемата опозициска партија која демонстративно ја напушти седницата барајќи оставки од Османи и Димитров за неуспехот со датумот, нарекувајќи ја Комсијата за европски прашања пародија.
На ова не им останаа должен ниту претседателот на Комсијата Артан Груби, ниту шефот на дипломатијата.
Димитров притоа побара од опозицијата конструктувност за носење на законот за Јавното обвинителство и и порача дека Македонија нема да дигне раце и оти мора да успее на патот кон ЕУ, дали во соработка со неа или покрај неа.
