Денеска производителите на слива оджаа протест во Делчево, каде беше блокирана раскрсницата кај Меѓународниот пат А3 кој го поврзува Делчево со бугарската граница.
На протестот учество зедоа над 30 производители на слива со својата земјоделска механизација. Тие еден час го блокираа сообраќајот во двете насоки.
Како што пренесува брегалнички.мк, во текот на протестот се случил инцидент при кој што додека неуниформирано лице на МВР од Полициската Станица во Делчево ги фотографираше тракторите и земјоделската механизација како и лицата кои протестираа на протестот.
На тоа дел од луѓето кои протестираа реагираа вербално сметајќи ја ваквата постапка за притисок и опструирање кон самиот протест.
-Протестот се организира со цел да се надмине кризната состојба, која се појави поради непостоење на никаков откуп на пијанечкото сино злато, кое во делчевскиот регион се мери на околу 6000 тони, род што скапува по нивите. Бидејќи не вроди со плод неодамнешниот протест пред општинската зграда на кој побаравме надлежните да ни помогнат во пласманот од кој зависи егзистенцијата на многу семејства во регионот, ние најавуваме блокада на Меѓународниот пат А3, изјави производителот Благојчо Митревски.
Се проценува дека без откуп во делчевскиот регион ќе останат околу 6.000 тони модра слива.
Слична е, се посочува, ситуацијата и во Берово и Пехчево каде според тамошните овоштари има 4.000 тони модра слива, која чека на откуп.
