Во меѓуресорната група која се очекува да се формира за спроведување и следење на мерките кои произлегуваат од Договорот од Преспа, а поврзани со промена на табелите на државните органи и институции, нема да членуваат јазични експерти. Ова остава простор за повторување на бројните правописни грешки, кои беа забележани досега, објави 21ТВ.
Носител на овој орган ќе биде Генералниот секретаријат на Владата. Новите табли ќе бидат на три јазици, на македонски, албански и на англиски. На пример, табла на едно министерство би изгледала:
Министерство за Транспорт и Врски
Ministria e Transportit dhe Lidhjeve
Ministry of Transport and Communications
На таблите ќе фигурира и новото уставно име на државата, Република Северна Македонија. Членови на групата ќе бидат државни секретари и претставници на разни министерства. Секој ресор ќе има по еден претставник, додека некои државни институции ќе имаат поголеми задачи за спроведување на овие препораки, како што се: МНР, МВР, Министерството за правда и Генералниот секретаријат на Владата. По ова, сите други државни органи ќе треба да формираат работна група која ќе работи по директива на оваа група.
На наредната владина седница ќе се дознаат имињата на членовите на групата, кои ќе се занимаваат со спроведување на новото уставно име на таблите на сите државни институции во Македонија. Промената треба да следи откако Грција ќе го ратификува протоколот за членство на Македонија во НАТО, а со тоа и треба да почне примената на новото име Република Северна Македонија.
