Најмногу снег наврна во Маврови Анови, а најладно ноќесна беше во Лазарополе, каде температурата падна до -14. Како што информираат од УХМР, снежната покривка во Маврови Анови достигна до 85 сантиметри, во Крушево – 34, 32 во Битола, 25 во Тополчани, 18 во Попова Шапка, 14 во Демир Капија, 13 во Дојран, Пожаране, 12 во Лазарополе и 11 сантиметри во Струмица.
Минимални температури има во Лазарополе – 14, -13 Маврово и во Крушево, -10 во Претор, Ѓуриште и Тополчани, -9 во Пожаране, -8 во Битола и Прилеп, -7 во Охрид, -6 во Тетово, Крива Паланка, Куманово, -5 во Скопје и Штип, -4 во Демир Капија, Струмица, Гевгелија, Дојран.
Времето во Македонија ќе биде сончево и студено, со мала до умерена облачност. Ќе дува слаб до умерен ветер од северозападен правец.
Утринската температура ќе се движи од минус шест до минус 14 степени, а дневната температура од минус еден до еден степен.
Во Скопје ќе биде сончево и студено, со мала до умерена облачност. Ќе дува слаб до умерен ветер од северозападен правец. Утринската температура ќе достигне до минус шест степени, а дневната температура до нула степени.
Под влијание на многу студена воздушна маса до средината на наредната седмица ќе се задржи променливо и студено време со температури кои на повеќе места преку целиот ден ќе се задржат под нула. Повремен слаб снег ќе има во недела, кога дневната температура ќе биде во благ пораст. Во понеделник и вторник ќе преовладува стабилно време, а нови врнежи од снег се очекуваат од среда.
