Само 18 отсто од територијата на Македонија е покриена со мрежна канализација, а се работи само за големите урбани средини, покажуваат податоци на Новинарите за човекови права.
Во градовите 87 отсто одводнувања на отпадни води се поврзани на градските водоводи, но во руралните средини дури 79 отсто од тоалетите не се поврзани со канализација или септичка јама. Шокантните податоци покажуваат и дека само 16 отсто од Ромите кои живеат во Скопје имаат тоалет во домовите, останатите користат надворешна варијанта.
По повод Меѓународниот ден на тоалетот, кој се одбележуваше денес, со цел да се подигне свеста за тоа дека ширум светот постојат многу луѓе кои живеат во несоодветни услови, оваа организација потсетува дека дури 60 отсто од светската популација, односно 4,55 милијарди луѓе, немаат тоалет дома.
