Битолски Пелистер на крајот на следниот месец ќе биде организатор на меморијален ракометен турнир, кој се очекува во иднина да прерасне во традиционален. Од 30 август до 2 септември ќе бидат одиграни девет меча во СЦ „Младост“ во чест на прославениот ракометар на битолската екипа и македонски репрезентативец, Боро Чурлевски.
Ќе учествуваат шест екипи, меѓу кои и домаќинот Пелистер, а ќе бидат поделени во две групи. Во групата 1 ќе играат новиот суперлигаш Бутел Скопје, потоа турскиот Селка Ескишехир Хентбол, каде игра македонскиот интернационалец Никола Костески и финскиот шампион и учесник во Лигата на шампионите, Кокс.
Во групата 2, покрај Пелистер, ќе настапат францускиот второлигаш Шербур Манш, како и грчкиот шампион Олимпијакос. Организатори на овој турнир се Пелистер и Општина Битола, па љубителите на ракометот во овој град ќе имаат можност да се „загреат“ со одлични натпревари пред стартот на новата сезона.
