Како што тврди „Дневник“, Советот на Општина Тетово досега нема донесено никаква одлука за утврдување на потребата за поставување урбана опрема, како и за условите и начинот за издавање на одобренијата за поставување
Билбордите во Тетово се поставени без соодветна општинска одлука, а фирмите што ги стопанисуваат не се избрани на оглас, пишува „Дневник“. Рекламните паноа во Велес, пак, се поставени од избрана фирма која потоа не потпишала соодветен договор, а паноата не се отстранети.
Како што тврди „Дневник“, Советот на Општина Тетово досега нема донесено никаква одлука за утврдување на потребата за поставување урбана опрема, како и за условите и начинот за издавање на одобренијата за поставување.
„Нема одлука ниту за утврдување на локациите на кои се поставени билбордите. Од Општина Тетово со денови не одговорија на нашите прашања дали е спроведена предвидената процедура за поставување рекламни паноа“, се вели во објавата на „Дневник“.
Овие сознанија, до кои дошол „Дневник“, деновиве ги потврдиле од советничката група на ВМРО-ДПМНЕ во Советот на Општина Тетово. Kоординаторот Горан Јовановски вели дека билбордите се поставени на диво.
– Одговорно тврдам дека Советот на Општина Тетово не донел одлука за утврдување на потребата за поставување урбана опрема, како и за условите, начинот и постапката за издавање одобрение за поставување урбана опрема, ниту, пак, е распишан оглас за избор на фирми што ќе стопанисуваат со билбордите. Од друга страна, склучувани се договори со одредени фирми. Последно што знам е дека се склучени договори со фирмите: „Сити борд“ од Тетово, „Скрин медија“ од Тетово, „Акцент медија“ од Скопје. Дали има нови договори, немаме информации како советничка група. Тоа значи дека практично билбордите се поставуваат на диво – изјавува Јовановски.
Претседателот на Советот на Тетово, Хисен Џемаили, не одговорил на прашањата кој стопанисува со билбордите, дали Советот донел одлука со која ги уредува начинот и постапката за издавање одобренија и дали и кога е распишан оглас за избор на фирми што ќе стопанисуваат со билбордите и на колку години. Топката на одговорност тој ја префрлил кај градоначалничката Теута Арифи и нејзиниот кабинет.
– За овие прашања најубаво е да се обратите до кабинетот на градоначалничката Теута Арифи или до лицето одговорно за односи со јавноста. Само знам дека има уредба на која се повика Советот, а според која е регулирано ова прашање – изјавил Џемаили.
Иако „Дневник“ телефонски се обидел да контактира со градоначалничката Арифи и со лицето за односи со
јавноста, не добиле одговори за билбордите.
По неколку дена чекање, не добиле одговори ниту на прашањата поставени по електронска пошта.
– За оваа проблематика многу работи се држат во тајност, се кријат како змијата нозете – рекол Јовановски.
Во Велес договор нема, билбордите стојат
Извори на „Дневник“, што ги познаваат состојбите во овој сектор предупредиле дека е слично и во Општина Велес,
односно тетовската фирма „Скрин медија“, која стопанисува и со билбордите во Велес, немала договор со Општината.
Секретарот на Општина Велес, Елизабета Јовчевска, во својата првична телефонска изјава истакнала дека во мај 2015 година избрале фирма на оглас, а потоа писмено одговорила дека избраниот понудувач не го потпишал договорот. Во писмениот одговор стоело дека официјално нема фирма што стопанисува со билбордите во Велес.
