Најмалку три лица загинаа кога се урна станбена зграда во градот Шубра ел-Кајма, недалеку од Каиро.
Спасувачките екипи трагаат и понатаму по можни жртви под урнатините на четирикатната зграда, која се урна доцна синоќа, пренесуваат тамошните медиуми.
Меѓу жртвите има адвокати, кои работеле во адвокатската канцеларија во зградата што ја поседувал еден од нив, изјави огранокот на адвокатската комора.
Агенциите пишуваат дека полицијата го оградила местото каде што се урнала зградата и ги евакуирала жителите на соседната зграда од безбедносни причини.
Засега не е познато што го предизвикало уривањето.
Според непотврдени извештаи се наведува дека првите резултати од истрагата на обвинителот покажуваат дека зградата била стара, но не се прецизира колку била стара и од што се урнала.
