На 10 август 2001 година во 08,00 часот на месноста викана Љуботенски Бачила на шумскиот пат меѓу село Љубанци и село Љуботен, возило на Армијата на Република Македонија наидува на две нагазни мини, поставени од албански терористи, при што во настанатата експлозија животот го загубиле 8 припадници на Армијата на Република Македонија, а 9 војници биле потешко и полесно повредени.
Животот го загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски, сите припадници на резервниот состав на Армијата од гарнизонот Скопје.
По настанатата експлозија кон припадниците на Армијата на Република Македонија бил отворен оган од пешадиско оружје, на што од страна на армиските сили било возвратено. Овој терористички акт претходно бил подготвен и организиран од страна на ОНА-УЧК. Главен организатор на поставувањето на мините е Џавит Асани со група од 25 лица, од кои дел биле од Косово, а дел од село Љуботен. Оваа група добива логистичка поддршка од дел на месното население, кое било ангажирано за следење на движењето и доаѓањето на припадниците на безбедносните сили во тој реон.
По овој терористички акт во село Љуботен и околината, продолжуваат воените дејствија на припадниците на ОНА спрема македонските безбедносни сили (10-12.08.2001 година). Од страна на терористичките групи сместени во селото, повторно бил извршен вооружен напад на позициите на безбедносните сили стационирани кај одморалиштето во близина на село Љубанци, а во внатрешноста на село Љуботен била забележана раздвиженост на униформирани и вооружени лица, како и испукување на поединечни и рафални истрели.
