Заменик помошникот државен секретар на САД, Метју Палмер, зборуваше на Форумот за дијалог во Преспа за лидерите кои крадат од граѓаните.
– Кога политичките лидери крадат од граѓаните, нивната земја го крши владеењето на правото, го забавува економскиот раст, ја зголемува нееднаквоста и го губи пристапот до услугите, изјави Палмер на панел дискусијата посветена на Економијата и бизнис соработката.
Корупцијата и организираниот криминал во власта беше и „лајт“ мотивот на извршната уредба на американскиот претседател Џозеф Бајден, кој претходниот месец најави дека САД ќе воведе црни листи за лица кои ги загрозуваат стратешките интереси на САД преку уривање на системот на владеење на право во земјите партнери на САД.
Она што е важно да се потенцира е дека Извршната наредба на Џо Бајден не се однесува ниту на Македонската опозиција, ниту пак на поединци, или што би се рекло – недржавни актери. Истата исклучиво се однесува на администрациите на регионалните влади во Македонија, Бугарија, Србија, Албанија, Косово, Грција, Босна и Херцеговина и Црна Гора. Секако, споменувањето на Преспанскиот договор, Охридскиот Рамковен договор, Дејтон и резолуцијата 1244 на ОН се само дел од стратешките документи спонзорирани од американската дипломатија, па оттука логично е да бидат од стратешка важност на САД.
Корупцијата и секојдневните афери се главен проблем на оваа власт, и на ова се однесува и декретот, смета и Климовски.
– На извршната власт на Р. Македонија ова треба да и е јасен сигнал дека секојдневните коруптивни скандали, непотизмот и клиентелистичкото однесување не само што ја дестабилизираат земјата и се веќе во завршна фаза во подигнување на гневот на граѓаните, туку и најгрубо се обидуваат да се доведат во прашање фундаменталните и идентитетските прашања, во играта со Бугарија со цел да успеат да останат на власт уште некое време, вели Климовски за Инфомакс.
